Speidel's Braumeister 20L Plus

  Speidel Braumeister PlusEch ha mech für dem BM20+ entschiede nach velne Gespräch mit Brauer-Kollege, Studium vo vel Literatur, stöbere im Hobbybrauer-Forum und luege vo velne Videos. Secher, ä Purischt werd emmer mit Chüble, Iichocher, Töpf und eifachschtem Züg Bier mache. Miteme BM erchoufsch du dier seh vel Komfort. Es mues jede für sech säuber entscheide öber wott umegöötsche wie im Mittelauter oder ned.

 Gfaut mier guet

Die Plus-Variante vom BM hett ä integrierte Chüelmantu und ä Abflusshahne unde drinn, das esch extrem hilfrich bim putze zum dr Schmodder uselaa. Verarbeitigs-Qualität esch sehr gut und sehr suber gmacht. S'Prinzip mitem Malzrohr (Infusions-Verfahre) funktioniert zuverlässig und esch sehr simpel. Äbefaus esch aues sehr handlech gmacht, so dass mer überau guet dezue chunnt. Schön si au die kontinuierleche Witerentwicklige vo Speidel.

Gfaut mier gar ned

Auso die Original-Hähne si es fertigs huere Glöu! Sie hei kei Aaschlaag dh wenn die ned perfekt uf 90 Grad dräiht hesch, rünne die Cheibe. Zudäm si die Dinger extrem schwärgängig und hei so ä blödi Teflon-Dichtig drinne wo ständi liechte Abrieb erzügt. Aui BM-Bsitzer woni könne hei aus erschts die Gfätterli-Hähne abmontiert und zum Fäischter usgworfe! Das bime Grät i dere Pris-Klass söttigs Glump debii esch, esch auso würklech erstuhnlech. Für öppe 40 Stutz bechunnsch 3/4" INOX-Chugelhähne wo perfekt funktioniere. 

KühlspiraleWas mer secher ou mues erwähne esch de Priis. Die Speidel Sache sie sehr guet gmacht, choschte aber ou rächt vel. Wenn auso nur mau so wotsch usprobiere chli Bier s'mache, esches vellecht sinnvoller mit eifachem, priisgünschtigem Equipment z'probiere bevor di in Unchöschte stürzisch.

Zudäm werd s'Bier mit tüürer Usrüschtig ned besser, es erhöht einzig d'Wahrschiinlechkeit dases guet werd. Suber und gnau schaffe muesch trotzdäm. Wie mer zu dene Sache steit wie Cloud-Aabindig, WLAN Modul etc esch ou jedem säuber überlaa. Zum guets Bier mache bruuchsch die Sache ned, zum spiele und prolete aber scho ;-)

Ech würd de BM witerempfähle für Lüt wo sech sicher si, dass si längerfrischtig wei Bier mache und Freud hei am Ufwand.