Chüelig

  Auso los zue, chüele chüele esch gar nedso eifach wie's tönt! Ech ha ja die Plus-Variante vom BM20 mit integriertem Chüelmantel. Mit däm elei chasch würzi abechüehle, aber das duuret lang und esch nedso effektiv, dass heisst du bruuchsch Uuuunmängene a Wasser. Us däm Grund hani no ä Chüelspirale zusätzlech zue taa.

Da mis Wasser gwöhnlech sehr chaut esch well's diräkt vom Bärg obe abe chunnt, ha ech Mantel und Spirale in Serie gmacht. S'Wasser fliesst also vo unde nach obe düre Mantel und denn vo unde nach obe dür die Spirale. Ideal wär eigentlech beides parallel, aber das esch mier zu kompliziert gse.

Wichtig esch eifach, dass möglechscht schnell under 80 Grad Würzi Temperatur chunnsch. Werum? Da dezue esch s'Stichwort Nachisomerisierung.

Für so Standard-Aastelltemperature für obergärigs Bier, auso um die 18-22 Grad wersch so problemlos klar cho. Aber wenn's chüehler muess wärde,
werd's schwerig. Lies mau im Braumagazin dä Artikel düre und bou dier denn dini eigeti Lösig oder tue sowit abechüehle wie haut chasch mitem
Wasser und denn s'Fass in Chüehlschrank miteme Inkbird (lueg ou bi Extras).

Grossi Nachteil vo de Chüelschrank Abechüehlig esch eifach, dass d'Hefe no ned drinn esch und Gfahr vonere Infektion so haut dütlech grösser esch.