Extras

  BierkitZum braue bruchts so es paar Sache dezue, wo useme riise Fundus us Krims-Krams bi de gängige Shops chasch zäme grabble. Veles devoo wersch vermuetlech eisch chouffe und ou nur eisch bruuche, denn landets uf de Haude mit de gschitterete Idee und werd ufem Konto "Leehrblätz" abbuchet.

Am Aafang hani ä riise-grossi Shopping Lischte zäme gschtöut woni ahand vom Literatur Studium gmeint ha dases das aues bruucht. De hani zäme mit es paar Kollege wo scho sit Jahre braue die Lischte aaglueget. S'Resultat esch gse, dasi die Lischte um 50% ha chönne chürze und defüür ä Huufe anders drii nää :-)

Nachfolgend es paar Sächeli, wo eim s'Läbe dütlech vereifache und ou ned vel choschte

Refraktometer

Miteme Refraktometer missisch dini Stammwürzi. Je nach däm was füre Skaala drinne esch, muesch umrächne zB Brix nach Plato. Das Problem hei scho veli gha und sech darum d'Müeh gmacht, Umrächner zur Verfüegig z'stöue.

Extrem wichtig esch bim mässe vom Vergärgrad dass de Alk-Fähler tuesch userächne, süsch bechunnsch zemlech fauschi Wärt über.

 

Temperatur

Du bruuchsch uf jede Fau einigermaase gnaui Thermometer. Mer mues immer weder mässe wie heiss öppis esch, drum nehme ech für das die Choch-Thermometer mitere Sonde ame Kabel äne. Die möge höchi Temperatuure verliide, so dass zB zum sterilisiere vo de Sonde die eifach chasch abchoche.

Da gets ou Umrächner (Misch-Chrüz) wenn verschiedeni Flüssigkeite mit unterschiedliche Temperature hesch und die wotsch ufe gmeinsami Temperatur bringe.

 

Pipette

Söttegi Pipette si sehr hilfriich, da du emmer weder muesch Proobe nää für's Refraktometer. Ech chouffe aube ä Sack Ei-Wääg Pipette.

Weni ä Proob während der Vergäärig wott nää, tue ech sone Pipette vorhär churz abchoche, da die mier us däm Sack ned steril voorchöme :-)

 

 

Waag

Bim Bierbraue esches vo Vorteil wenn chli gnau tuesch nüdere und übere präzisi Waag verfüegsch.

Bi de Schüttig es paar Gramm mehr oder weniger möche de Brate ned feiss, aber spätischtens bim Hopfe wersch nachhär merke wieso. Zudäm - wenn ned i der Laag besch die Chliine Sache im Läbe richtig z'mache, wersch ou nie die Grosse beherrsche.

 

Zuckerdosierer

Ech tue d'Nachgäärig i de Fläsche mache. Wie bim Hopfe muesch da sehr gnau schaffe. Mitem Zucker stüürisch, wievel Gramm Greta (Co2) nachhär im Bier esch.

 Wenn z'vel Zucker nimmsch, chas dier afaa Fläsche verjage, was bi Glassplitter zu sehr schwäre Verletzige cha fühere! Mit some Dosierer chasch 0.1g gnau iistöue wie vel Zucker ine Fläsche chunnt. Zudäm geits demit zackig und masch ou kei Souerei.  

 

Büürschteli

Die Büürschteli si usem Braumeister Zubehöhr. Vorauem das Länge esch sehr praktisch zum reinige vo de Zue- und Abläuf vo de Pumpi im Bode. Det setzt sich gärn öppe chli Schmodder ab und esch schwerig use z'becho.

Die rundi Büürschte esch vorauem guet zum reinige vo de Heiz-Spirale. Meh dezue uf de Putz-Site.

 

Brauerei-Jod

Mitem Braumeister ned jod-normal z'sii esch gloub' ech fasch ned möglech. Wenn aber irgendwenn aafahsch dini eigete Rezäpt z'entwickle cha's doch sehr hilfriich sii exakt z'wüsse ob vorem abmaische die Rascht no chli muesch verlängere.

Sones Gütterli esch sehr ergiebig und choschtet ou ned vel i de gängige Webshops.

 

 

Manometer

Sones Fläsche-Manometer würdi jedem Aafänger dringend empfähle. Es hilft dir z'verhindere dass ä Fläsche explodiert, faus mau über-karbonisert hesch. So chasch emmer no im Notfau rächtzitig entlüfte.

Äbefaus gsehsch guet wenn der Druck nümme aaschtiigt, dass jetzt d'Nachgäärig fertig esch und d'Fläsche zum Riife chasch i Chüehler stelle.

 

Gärfass

Veli chouffe sech sones Braumeister Set. Det debii esch emmer sones Plastikfass mit Plastik-Hahne. Das esch per se ned schlächt, aber müehsam zum putze, wöu die Öffnig obe wo de Deckel druf chunnt, ä relativ chliine Durchmässer hett.

Bsunders es Gärfass muesch emmer extrem penibel suber putze, was eso müehsam esch. Plastik verchratzet sehr schnöu, und grad i dene Chrätz inne setzte sech de gärn chliini bösi Chäferli fescht wo definitiv ned wosch ha.

Ech ha mier drum es 30l Speidel Edelstahl Gärfass gönnt. Es gseht ned nur dütlech besser uus, sondern esch eifacher suber z'haute und stabil. Es hett im Deckel es Loch dinne wo ä Gärspund chasch iisetze

 

 

Inkbird

Frücher oder später wenn guets Bier wotsch mache wersch ned ume Gär-Füehrig umechoo. Nur wenn Gär-Temperatur exakt passt produziert dini Hefe die Aroma wo du wotsch haa. Während de Gäärig stiigt im Fass Temperatur aa.

Je wärmer dass du tuesch vergääre, umso mehr luschtigi Aroma chöme use bis zum Fusel-Alkohol. Jedi Hefe hett ä ideali Gär-Temperatur, wo möglescht gnau söttsch iihaute. Damit das geit, hani sone Inkbird Regler zue taa.

Dä chunnt id Steckdose und a die beide Aaschluss chöme de Chüehlschrank wo's Gäärfass dinne esch und es Heizelemänt. I mim Fau esch das ä chliine Reise-Haarföhn uf niderigschter Stuufe. De Sensor chunnt öppe i de Mitti usse as Gärfass, drum ume chli Styropor damiter vo de Chüelschrank-Temperatur isoliert esch.

Wenn jetzt die Temperatur vo de Würzi über de soll-Temperatur esch, schaltet de Inkbird de Chüehlschrank ii, oder wenn's absinkt de Föhn. Mehr zum Thema gfindsch hie