Iimaische

  Speidel Braumeister Plus Nachdäm bim Braumeister s'Programm vo dim Rezäpt aaglaa hesch, muesch chli warte bis d'Iimaisch-Temperatur erreicht esch. Geduld ha, nüt überjufle! Bim Iimaische esches wichtig, dini Schüttig langsam drii z'tue. Es sött nüt usem Malzrohr in Braumeister ie gheie und es sött ou nüt ide Gägend umesprütze. Wenn du die originali Brüdehuube vo Speidel hesch, de chasch die umgekehrt druf legge und als Trichter benütze!

Rüehre

Nachdäm dini Schüttig jetzt im Wasser esch, muesch aues guet iirüehre. Für das gits spezielli Maischepadel. Ech ha mau so eis kouft, genau eisch bruucht u denn als Deko a d'Wand uegnaglet. Miersch esch das ächt z'müehsam gse und sooo gross esch das Malzrohr bim BM20 ja ou weder ned. Ha mir drum sone Rühr-Quirl zuetaa und tue mitem Akku-Schruuber sehr langsam alles guet rüehre. Da Quirl ufem Bild esch vom Hornbach, es get dere ou us Edelstahl.

Ah ja, wenn demit fertig besch, wär's ä guete Momänt zum de Maische-PH Wärt z'mässe...