Lütere & Nachgüss

  Am Aafang hani grossi Müeh gha z'verstaa, wie das mit dene Nachgüss geit, werum dass das immer in Rezäpt aagää wird usw.  Wenn dech die Zämehäng im Detail interessiere, git's ä guete Biitrag im Bier Kompendium.

Speidel Braumeister PlusLütere bim Braumeister esch ja sehr eifach. Du muesch nur s'Malzrohr usezieh und uf de Haltebügu lege und chli warte bis es abtropft hett. Das esch jetzt de Momänt, wo mau söttsch ä Mässig mache, wie die aktuelli Stammwürzi esch, zb miteme Refraktometer.

Entscheidend esch einzig d'Aagab im Rezäpt, weli Stammwürzi das Bier söu ha. Ab da wird's jetzt luschtig, wöu's mehreri Wäg git zum witerfahre. S'Rezäpt seit zB das Bier söu 12 Plato Stammwürzi haa, mis Refraktometer misst aber nur Brix. Wenn ou so eis hesch, muesch auso umrächne. Das chasch zB ufem Fäbu sinnere Site mache, App ufem Smartphone oder vo Hand.

Grundsätzlech esches wichtig, Nachgüss ned eifach ufe Träber ue z'lääre, sondern langsam dezue gää. Ech laa drum d'Sieb ufem Träber und tue miteme Chrueg langsam s'Wasser uf das Sieb la louffe und ringsum chli verteile. Es schadet ou nüt, wenn z'ersch die Sieb usenimmsch, mitere Chelle dr Träber chli uflockerisch damit das Loch vo de Zugstanfe i de Mitte zuegeit, süsch louft s'Wasser vo de Nachgüss einfach nur dür das Loch statt dür de ganz Träber.

Gömmer devoo us, dass dini Stammwürzi scho 12 Plato hett. Das esch zwar fasch ned möglech, cha aber passiere :-)

I däm Fau muesch in Sache Nachgüss jetzt was mache?

  • Du chasch jetzt afaa choche und nachem Choche weder so vöu Wasser dezuegää wie verdunschtescht esch, de besch weder bi 12 Plato. Vorteil: eifach zum träffe und angäblech sige reini Vorderwürzi-Bier s'Beschte wo mer cha mache.

  • Die anderi Möglech keit esch so lang Nachgüss z'gää, bis uf öppe 11 Plato besch, denn choche und warte bes weder bi 12 Plato besch.

Und was esch, wenn ech vor de Nachgüss 13 Plato oder meh ha?

Denn chasch jetzt afaa Nachgüss mache und muesch di entscheide, weli vo dene obe gnannte Möglechkeite wotsch witerverfolge. Auso entweder Nachgüss bis abe uf 12 Plato, denn choche und weder uffülle (verdünne) oder witer abe und mit choche wieder uf 12 Plato ue.

Jetzt hani aber vorem choche weniger als 12 Plato, was jetzt?

Jetzt chasch einfach es Dünnbier mache und jedem säge, dass du das genau so hesch wöoue mache zur Abwächslig. Oder du tuesch s'Choche so lang verlängere, bis uf 12 Plato besch.

Ja super jetzt hani nachem Choche 13 Plato und 26L im Chessu, wieviel muesi jetzt verdünne für 12 Plato z'erreiche?

Das chasch ganz eifach usrächne: IST-Stammwürzi geteilt dür SOLL-Stammwürzi, das Minus 1 und den mau Chessu-Inhalt = Liter zum verdünne. Andersch usdrückt mit konkrete Zahle heisst das (13:12) - 1 x 26 = 2.16L und denn besch weder bi dine 12 Plato.