Putze & Chemie

   Bierbraue bedütet sehr suber schaffe. Vergiss nie, du machsch es Läbesmittel!! Du wottsch nachhär weder de Schisser, Buuch- no Grindweh ha. Das geit nur, wenn dis Gschirr und aues wo mitem Bier, de Würzi und Hefe in Kontakt chunnt ned verdräckt esch. Es gibt kei sterile Dräck!

Nachem Würzi-Choche esch d'Würzi steril. Auses was jetzt demit in Berührig chunnt, sötti möglechscht steril sii. Bis d'Hefe aafaht wäärche, hei die böse Chäferli freis Spielfäld und Gfaahr vonnere Infektion esch jetzt bsunders gross. Zum Reinige vom Braumeister chasch useme riiiiese Sortimänt a Chemikalie uswähle. Ech nehme aber nur Waschsoda. Nachem abfülle is Gärfass tue ech mit heissem Wasser z'ersch alles usspüehle, fülle de Braumeister weder uf, schalte d'Heizig und Pumpi ii uf 60 Grad und tue denn 1h lang aues la dürepumpe. Ech legge aues zum putze drii dh Sieb, Chüehlspirale, Chelle usw. Waschsoda esch ä extrem guete Schmutzlöser und stinkt ned.

Zum churzfrischtig desinfiziere nütze ech Isopropanol wie zB Halades Alco. Mit däm tue ech mis Gärfass nachem Putze iispraye. Wichtig esch, dass tuesch warte bises verdampft esch, nur so desinfizierts. Hähne tue ech zerlegge und vorem Gebruuch abchoche.

Wenn ganz sicher wotsch gaa, chasch das Züüg reinige wie d'Milchpuure ehri Sache: eisch alkalisch, s'nächscht mau suur immer abwächsligswiis.

Bierfläsche sötsch IMMER sofort nachem trinke heiss usspüehle und möglechscht aui Räschte uswäsche. Ä ganz dummi Idee esches übrigens, Bierfläsche zum desinifiziere i Bachofe ie z'tue. Im Forum het's veli Info beträffend Reinigung und Desinfektion. Ech be kei Fründ vo agressive Chemikalie, drum tue ech mini Fläsche ganz normal id Spüehlmaschine drii. Ha bis jetz no NIE ä Infektion gha und d'Fläsche, de Braumeister und alles Zubehöhr gseht uus wie früsch usem Lade.

Und nomau, das Gärfass mues auso würklech penibelscht genau perfekt suber putzt si! Das esch die empfindlechscht Stell um ganze Prozäss! Falls du Gärproobe düre Hahne wottsch nää, denn unbedingt dää ou JEDESMAL weder guet mit Halades Alco iispraye...