Rezäpt

  Speidel Braumeister Plus Ohni Rezäpt Bier mache dörfti es schwerigs Unterfange sii, z'mindschte aus Aafänger. Sehr ä umfangriichi und gueti Quelle für Rezäpt gfindsch bi maischemalzundmehr. Uf dere ehrer Site chasch nach auem möglechem sueche, wenn wotsch zb ou diräkt aapassti Rezäpt für de Braumeischter.

Mis Lieblingsrezäpt hani ou vo det, es heisst Triticum Wormatia. Das esches es bitz es gfährlechs Weize, es plätscheret i Biochäuer abe wie s'Schmelzwasser vo de Bärge im Früehlig, hett aber doch no rächt Alk dinne.

Dr Üelu hett ou veli Braumeischter Rezäpt uf sinnere Site druf, si aber für de 50L gmacht, muesch auso wenn ou ä 20L BM hesch eifach umrächne (ja genau, das mitem Dreisprung...)

Uf de Speidel Site gits äbefaus für de BM aapassti Rezäpt (wär hätt das dänkt...). Wenn es WLAN Modul a BM naglisch, chasch die Rezäpt diräkt i BM importiere und muesch dech ned mit dere fummlige Programmierig umenärve.

Die Rezäpt si aui relativ gliich ufboue. Es faht meischtens mit de Mängi vom Haupt- und vom Nachguss aa. Ech achte da nümm gross druf, sondern ech nehme emmer 25L Hauptguss und achte uf Zämesetzig vo dr Schüttig für 5kg. Im Biespiel mitem Triticum heisst das 25L HG, denn 2.5kg Weizen Malz, 1.25kg Pilsner und 1.25kg Wiener Malz. Uf was aber muesch luege esch s'Verhäutniss vom Hopfe zur Usschalgwürzi. Du wottsch ja ä bestimmti Bitterkeit ha, drum chasch ned eifach der Hauptguss ändere, sondern muesch entsprächend de haut ou meh oder weniger Hopfe drii tue. Was uf kei Fau darfsch mache, esch die Aagabe zum Nachguss ärnscht nää. Das esch meh so ä Richtwärt aus ä sinnvolli Aagab (us däm Grund hani ä separati Site zu däm Thema gmacht).

Nachhär geits witer mit dem Maische-Plan. Dä seit wie lang weli Raschte bi weller Temperatur müesse gfahre wärde. Das esch sehr wichtig und het sehr grosse Iifluss uf de Gschmack & Stil vom Bier. Was ä chli ä Seich bim BM esch: ech ha's bis jetzt ned fertigbrunge ä höcheri Temperatur vor ä teuferi z'programmiere. Im Triticum-Rezäpt gsehsch dasmer zum iimaische 57 Grad sött ha, die erschti Rascht aber bi 55 Grad esch. De Grund esch, dass sech bim iimaische s'Wasser abchüelet.

Bim BM chasch i some Fau manuell uf 57 Grad heize und nachem iimaische s'Maische-Programm starte oder haut ou d'Iimaisch-Temperatur uf 55 Grad programmiere. Das esch beides nedso so optimau.

KühlspiraleWas nachhär ou unbedingt muesch beachte si Zite vo de Hopfe-Gaabe. Die wärde nämlech immer hindertsi agää.

Das bedütet konkret, dass die Aagabe sech uf Chochduur vorem Ändi bezieh. Wenn's auso heisst zB Chochduur 90min und 20g Hopfe bi 30min sötsch drii tue heisst das, du muesch das 30min vorem Ändi mache, auso 60min nachdem Choch-Start.

Das mitem Hopfe dünkt mech augemein so chli schwerig. Ech säuber ha ned gärn vel Bitterkeit im Bier. Sones hardcore IPA verursacht bi mier Brächreiz. Es esch haut aues emmer ä Gschmacksach. Bestimmti Bier Type verlange sehr vel Hopfe und wärde teils sogar no i de Gärig inne mit Hopfe gschtopft, anderi Bier wie äbe es Weize esch mit Bitterkeit und vel Hopfearoma völlig denäbe.

Wenn öppe Vergliichswärte suesch vo bekannte Bier, git's bim Schwizer Bier Brauereiverband ä schöni Uflischtig wo de gseh, weles Bier zB wie vel IBU hett, oder Stammwürzi usw.

Äbefaus mit Vorsicht z'gniesse si Aagabe zu Gärtemperatur und Riifig. Das hanget sehr stark vo dr verwändete Hefe ab. So oder so wärde obergäärigi Bier mit höchere Temperature vergoore aus undergäärigi Bier.