Usrüschtig

  BierkitMit weller Usrüschtig das wotsch afaa chammer nedso schnöu beantworte. D'Fraag esch eifach, wie langfrischtig das Hobby wotsch betriibe und wie wit dass du dech wotsch in Unchöschte stürze. Es git zB zum prööble sogeannti Bierkits, wo mit wenig Stütz und Ufwand chasch probiere ä Hopfemaltine z'kreiere. Wie guet das werd und öb devoo Chopfweh und Magebrönne bechunnsch chani dier ou ned säge, ha das nie probiert.

Wenn meh uf's Uurtümliche schteisch, denn chasch ou so mit Iichocher und Töpf schaffe, wie i de Aaleitig vom Brauer-Frorum beschriebe esch. Mer cha auso ou mit wenig finaziellem Ufwand ä Usrüschtig zäme stöue wommer demit guets Bier cha broue. Ech säuber cha mit däm Verfahre nüt afaa. Wenn nämlech die Bilder i dere Aaleitig chli schtudiersch, gsehsch das da ständig muesch Züg umegöötsche. Mech stört das, ech wott Bier mache und ned spiele. Dere Aalage gits ou us Set in aune mögleche Grösse, zB vo Polsinelli.

Dütlech eifacher und komfortabler, aber haut nedso retro-anarcho-mässig esch d'Verwändig vo Automate wie zB ä Speidel Braumeister oder ä Grainfahter. Im Brauer-Forum hetts äxtra es Unterforum, wo Lüt ehri Aalage vorstöue. Lueg de mau chli ie, da chusch usem stuuhne nümm use was für ä Ufwand teil Lüt da triibe :-)

Zämegfasst esch wichtig: egau für was dech tuesch entscheide, auses wo mit Bier und sine Vorstuufe in Berührig chunnt mues sehr suber sie, teils sogar möglescht steril. Je meh Grümpu auso das verwändisch, umso grösser esch de Ufwand bim putze vo däm Züg...säubscht ä Minimal-Usrüschtig get einiges z'tue! 

Es git kei Diskussion öb eis vo dene Syschtem besser esch aus s'Andere. Jedes hett sini Vor- und Nachteil. Muesch dier eifach überlege öb wotsch umegfätterle, Bier braue us Event zelebriere oder so wie ech eifach Bier braue und Freud dra ha.